Marzo: nu poco chiove
e n'atu ppoco stracqua,
torna a chiovere e schiove,
ride 'o sole cu ll'acqua.
Mò nu cielo celeste,
mò n'aria cupa e nera:
mò d' o vierno 'e tempesta,
mò n'aria 'e primmavera.
Marzo: nu poco chiove
e n'atu ppoco stracqua.
N' auciello freddigliuso
aspetta ch'esce 'o sole:
ncopp'o tturreno nfuso
suspireno 'e vviole.
Catarì! Che vuò cchiù?
Tiéneme, core mio!
Marzo, tu 'o ssaie, sì tu,
e st'auciello song'io...
marzo: nu poco chiove
e n'atu ppoco stracqua
