lunedì 19 gennaio 2015

settant'anne 'e cammenate


Pino Daniele, chi tene 'o mare, 1979

Raffaele Viviani, Chi ha fatto ammore a Napule, 1944

Guarda 'a ccà 'ncoppa Napule
e doppo dimme che paravisiello
'E vvarche 'e pesca passano
cu 'e lume a prora, 'a parte d'o Castiello

Sient, dint'o silenzio
'a botta 'e rimmo quanno taglia 'o mare
E vocano e se sperdono
assieme 'e vuzze 'e vvoce 'e marenare

'E stelle e 'e lume tremmano
comme a stu core mio tremma stasera
e a mmare tuculeano
tutt'e fanale e 'e lume d'a riviera

e io guardo stu spettacolo
e smanio e chiagno e m'arricordo 'e te
chi ha fatto ammore a Napule
chesta serata nun 'a pò vedè
.....
Stasera 'o mare 'e Napule
nennella mia, pare addurmuto e stanco
Ccà ce venette giovane
primm' 'e tenè qualche capillo bianco

Cenette dint'a n'angolo
tutt'appartate cu nisciuno attuorno
cchiù chello ca lassavamo
e spisso 'o cunto se chiammava a gghiuorno

'E lume e 'e stelle tremmano
comme 'stu core mio tremma stasera
Che friddo dint'all'anema
a 'a sera è calma: stammo a primmavera

E io guardo chesta tavula
e smanio e chiagno e m'arricordo 'e te
E penso 'mpallidendome
ca nun m'e ddato manco 'e te vedè
......
Stasera 'o mare 'e Napule
sceta st'ammore che è na vita 'e bene
e 'o sangue me fa sbollere
me mette 'ncore n'ata vota 'e ppene

Nennella è n'ata femmena
io so n'at'ommo: e ancora sofferenza
Na scappatella 'e ggiovane
ca m'ha turbato tutta n'esistenza

'E lume e 'e stelle tremmano
comme stu core mio tremma stasera
ritorna 'o desiderio
ma tu nun siente st'ultima preghiera

E io guardo 'o mare 'e Napule
e smanio e chiagno e m'arricordo 'e te
Chi ha fatto ammore a Napule
stasera 'a luna nun l'add'a vedè

::::::::::::::::::::::::::::::::::::::::::::::::::::.

a Ciro che sognava ISF, quel lampione quella sera a Spaccanapoli, a quell'amico che non conosco

::::::::::::::::::::::::::::::::::::::::::::::::::::.


Pino Daniele - cammina cammina, 1977


Raffaele Viviani, Cammenata, 1944

cammenata, cuntannete 'e passe
te siente
nu niente
pe' miez 'a città

pe na via, primma 'a piglie, pò 'a lasse
e 'o pede
te cede
te siente 'e mancà

cammine, cammine, cammine
tra tanta vetrine
cu robba 'e magnà
uocchie chine
stentine vacante
ma quante ma quante
ca vanno 'accattà

e sta folla che trase e che ghiesce
cu 'e cuoppe d'o pesce
cu 'a carne cu 'o vino
te passa vicino
ma senza guardà

comm è bella sta salumeria
ce truove uno 'e tutto
salame presutto
formaggio buatte
sacicce paisane
e pò 'e muzzarelle nustrane
ca sghizzano latte

e cammine, cammine, cammine
ma ll'ati vvetrine
te fanno scappà
e tu pienze avveluto che fatto
pe sta a chistu stato
che rè nu piatto
cu 'o ppoco 'e magnà?

è na colpa che 'e fatto sta guerra?
te ce hanno mannato
era meglio a fernì sotto terra?

grattaciele d'e grande putiente
'a ggente
cuntenta
p'o munno ce sta
ma pò contate tutte 'e scuntiente
ca campano 'e stiente
nè sanno arrubbà

chella è n'arte si si 'ntelligente
si no nun faje niente

'a madonna te vede, te vede
ma quanno pruvvede?
chesto se chiamma campà?

cammenata, cuntannete 'e passe
te sient
nu niente
pe miez' 'a città